التخطي إلى المحتوى
سؤال وجواب بخصوص لقاح كورونا للمتخوفين دكتور كريم درويش
يقول دكتور كريم درويش  اخصائي امراض الباطنه والكبد والمناظير  خصوص لقاح كورونا للمتخوفين فى سؤال وجواب
س: أنا كنت مصاب بالفيروس.. إمتى أقدر آخد التطعيم ؟!
◾ج: تاني يوم بعد التعافي.
(بعض) الدول بتأخر المصابين تلات شهور لأسباب لوجستية فقط عشان توفر اللقاح لغيرهم بإعتبار إن احتمالية تكرار الإصابة منخفضة في أول تلات شهور.
◾س: طيب لو خدته وأنا مصاب ومكنتش أعرف؟
◾ج: مش هيضرك لكن مش هيفيدك في علاج المرض.. لأنه بياخد أسابيع عشان يبني مناعة في جسمك تقدر تقاوم الفيروس وتمنعه من دخول الخلايا.
◾س: أعمل مسحة قبل اللقاح؟
◾ج: لأ.
◾س: هبقى معدي للناس لو خدت اللقاح؟
◾ج: لأ.
◾س: اللقاح هيخلي المسحة بتاعتي إيجابية؟
◾ج: لأ.
مسحة إيجابي = إصابة بالفيروس.
◾س: اللقاح آمن في الحمل؟
◾ج: مفيش غير دراسات محدودة اتعملت ع الحوامل.. اللقاح آمن نظرياً لكن حالياً لا ينصح باللقاحات في الحوامل إلا إذا كان فيه احتمالية كبيرة للإصابة وللمضاعفات.
◾س: خدت اللقاح وعاوزة أحمل؟
◾ج: منظمة الصحة بتقول مفيش ضرورة لتأجيل الحمل بعد اللقاح.. يعني بعد الجرعة التانية ممكن تحملي.
◾س: اللقاح آمن في الرضاعة؟
◾ج: مفيش غير دراسات محدودة اتعملت على المرضعات.. لو في مكان فيه انتشار وبائي وعندك عامل خطورة هنصح بيه.
◾س: بعد ما خدت اللقاح أوقف الرضاعة الطبيعية؟
◾ج: لأ.. كملي الرضاعة عادي.. ودي توصيات الهيئات العلمية.
◾س: آخد لقاح إيه الصيني ولا استرا ولا… ؟
◾ج: أحسن لقاح في العالم بالنسبة لك هو أول لقاح تقدر تاخده أياً كان نوعه.
◾س: بس أنا متاح قدامي الاختيار ومحتار؟
◾ج: مع إن ده مبيحصلش.. بس ترتيب اللقاحات الحالية في رأيي – الشخصي – : فايزر – موديرنا – جونسون – أوكسفورد / أسترازينكا – الروسي – الصيني.. في المستقبل ممكن الترتيب يتغير أو تدخل فيه لقاحات جديدة.
◾س: الأخبار الأخيرة عن الجلطات ممكن تغير حاجة؟
◾هي نادرة الحدوث لكن على أساسها ممكن السيدات تحت ٣٠ سنة يحاولوا ياخدوا فايزر أو موديرنا.
◾س: عندي مرض مناعي – عندي السكر – عندي الضغط – باخد علاج كيماوي – عندي مشكلة في الدم – عندي حساسية صدر.. ينفع آخد اللقاح؟
◾ج: مفيش أي مشكلة طبية تمنع من أخد اللقاح غير إن يحصلك حساسية شديدة من أحد جرعاته.. كل اللقاحات زي بعض في كل الأمراض مفيش فرق بينها.. مفيش لقاح معين أحسن من غيره للمرضى اللي عندهم مشكلة طبية معينة.
◾س: بس أنا خايف من اللقاح وآثاره الجانبية؟
◾ج: اللقاحات اتاخدت لملايين البشر مع آثار جانبية نادرة لكن ده قرارك الشخصي..
الفيروس موجود واللقاح موجود.. و الغالبية العظمى من الناس هتاخد واحد من الاتنين قبل التاني.

الأسئلة الشائعة

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إخلاء مسئولية: جميع المقالات والأخبار المنشورة في الموقع مسئول عنها محرريها فقط، وإدارة الموقع رغم سعيها للتأكد من دقة كل المعلومات المنشورة، فهي لا تتحمل أي مسئولية أدبية أو قانونية عما يتم نشره.