هو إيه اللي بيحصل في كواليس الاقتصاد العالمي، وليه الرئيس الأمريكي دونالد ترامب فجأة طالع يهدد أوروبا برسوم جمركية 50%؟، هل ده مجرد تهويش؟ ولا الحرب الاقتصادية راجعة من تاني؟
اللي حصل إن رئيس أمريكا دونالد ترامب، نزل منشور ناري على منصته “تروث سوشال”، وقال فيه إن الاتحاد الأوروبي “صعب التعامل معاه” واتهمه إنه اتأسس علشان يستغل أمريكا تجاريا.
وقال “ترامب” بوضوح إنه من أول يونيو، بيقترح فرض رسوم جمركية بنسبة 50% على منتجات أوروبا اللي داخلة أمريكا، والخبر ده ده وقع زي القنبلة في أوروبا، وفعلا البورصات هناك نزلت جامد.
عندك مثلا، بورصة باريس نزلت أكتر من 2.4%، وفرانكفورت خدت ضربة بـ2%، وميلانو خسرت حوالي 2.7%.. طب ليه السوق اتأثر بالشكل ده؟
عشان أي تهديد بزيادة الجمارك معناه إن المنتجات الأوروبية هتبقى أغلى في السوق الأمريكي، وده ممكن يضرب التصدير ويأثر على الاقتصاد، ودي مش أول مرة يستخدم فيها ترامب سلاح “الجمارك” كسلاح تفاوض وضغط، هو شايف إن أمريكا بتتضرر من الاتفاقيات التجارية القديمة، وبيحاول يفرض واقع جديد بالقوة.
ودي حركة مش بعيدة عن تفكيره، لأنه استخدم نفس الأسلوب مع الصين وفرض رسوم اتخطت 160%، بس اللي يهمنا هنا إن التوقيت غريب، يعني ترامب بيرجع يكلم عن أوروبا والعدالة التجارية، اللي بيقولوا عليه خبراء الاقتصاد إن الرسوم الجمركية دي لو اتنفذت، ممكن تعمل تأثير مزدوج، فمن ناحية تضغط على شركات أوروبا، ومنن ناحية تانية هترفع الأسعار على المستهلك الأمريكي نفسه، وده ممكن يزود التضخم، اللي أصلا الفيدرالي الأمريكي بيحاول يسيطر عليه.
كمان، ده ممكن يولع حرب تجارية جديدة بين أمريكا والاتحاد الأوروبي، ومع العلاقات اللي أصلا فيها توتر بسبب ملفات زي الصين وأوكرانيا و الوضع ممكن يبقى معقد أكتر.
بس الأكيد، إن أوروبا مش هتسكت،
ولو ترامب فعلا بدأ يطبق السياسات دي أكيد هنشوف رد فعل أوروبي سواء برسوم مضادة أو بسياسات حمائية، يعني إحنا قدام سيناريو فيه احتمال كبير لصدام اقتصادي ضخم ما بين قوتين من أكبر اقتصاديات العالم.
التعليقات