يا ترى إيه اللي حصل في سوق الصرف النهاردة 15 يونيو 2025؟ .. وليه الدولار رجع يرفع تاني بعد فترة استقرار نسبي؟ ,هل الموضوع له علاقة بالصراع اللي اشتعل بين إيران وإسرائيل؟ وهل الدولار هيكمل ارتفاع ولا فيه أمل يستقر؟
النهاردة سوق الصرف في مصر شهد حالة من القلق والترقب .. بعد ما الدولار رجع يسجل ارتفاعات ملحوظة قدام الجنيه المصري.. الارتفاع ده جه بعد فترة من الاستقرار النسبي.. اللي كانت الناس بدأت تتنفس فيها الصعداء.
الأسعار في البنوك الرسمية والموازية بدأت تتحرك لفوق .. والطلب على الدولار زاد بشكل واضح .. وده خلا كتير من المتعاملين في السوق في حالة حيرة وتساؤلات .. إيه اللي بيحصل؟ .. وإيه أسباب الارتفاع ده بالذات في التوقيت ده؟
مفيش شك إن الأحداث الجيوسياسية اللي بتحصل في المنطقة ليها تأثير كبير جدًا على الأسواق العالمية والمحلية .. ومع اشتعال المواجهة بين إيران وإسرائيل.. العالم كله بقى في حالة ترقب وقلق.
الصراع ده مش مجرد صراع عسكري بس .. ده بياثر بشكل مباشر على حركة التجارة العالمية .. وعلى أسعار البترول .. وده بدوره بينعكس على أسعار العملات.
لما بيكون فيه توترات في منطقة حساسة زي الشرق الأوسط .. المستثمرين بيلجأوا للأصول الآمنة .. وأهمها الدولار الأمريكي .. وده بيزود الطلب عليه عالميًا .. وبالتالي سعره بيرتفع.
تخيل كده إن فيه منطقة فيها بترول وغاز كتير .. وفجأة يحصل فيها حرب أو تهديدات بالحرب.. المستثمرين بيخافوا على استثماراتهم.. وبيسحبوا فلوسهم من الأسواق الناشئة زي مصر.. وبيحولوا فلوسهم لدولار.. وده بيعمل ضغط كبير على العملة المحلية.
طب هل فيه أسباب تانية لارتفاع الدولار غير التوترات؟
طبعًا التوترات الجيوسياسية عامل مهم.. لكن مش هي السبب الوحيد.. فيه عوامل تانية كتير بتساهم في حركة الدولار.. زي تراجع التدفقات الدولارية. مصر الفترة اللي فاتت كانت بتستقبل تدفقات دولارية كويسة.. سواء من السياحة أو تحويلات المصريين في الخارج.. أو استثمارات أجنبية لكن مع أي توتر.. التدفقات دي بتقل أو بتتبطيء.. وده بيعمل عجز في المعروض من الدولار.
كمان زيادة الطلب على الدولار للاستيراد.. مع اقتراب مواسم معينة .. أو زيادة حركة الاستيراد بشكل عام .. بيزيد الطلب على الدولار عشان نغطي فاتورة الاستيراد .. لو الطلب زاد عن المعروض .. سعر الدولار بيزيد.
وفيه كمان التوقعات السلبية للمستثمرين.. لما المستثمرين بيشوفوا إن فيه حالة عدم استقرار.. أو توقعات سلبية للاقتصاد.. بيميلوا إنهم يحولوا فلوسهم لدولار.. عشان يحافظوا على قيمة فلوسهم.. وده بيزود الضغط على الجنيه المصري.
نيجي للسؤال المهم.. هل الدولار هيكمل ارتفاع ولا هيستقر؟
توقعات سعر الدولار الفترة اللي جاية .. مرتبطة ارتباط وثيق بالوضع الجيوسياسي .. لو التوترات بين إيران وإسرائيل زادت .. أو استمرت لفترة طويلة .. فده هيخلي سعر الدولار يفضل في مساره التصاعدي.. لكن لو حصل تهدئة للأوضاع .. أو العالم قدر يسيطر على الصراع ده .. ساعتها ممكن نشوف استقرار في سعر الدولار .. أو حتى تراجع بسيط.
كمان الإجراءات اللي هتاخدها الحكومة المصرية والبنك المركزي هيكون ليها تأثير كبير .. هل هيتم توفير سيولة دولارية أكبر؟ .. هل هيكون فيه إجراءات لتعزيز الصادرات وجذب الاستثمارات؟ .. كل دي عوامل هتحدد مصير الدولار الفترة اللي جاية.
الوضع الاقتصادي العالمي نفسه كمان بيأثر .. لو فيه ركود عالمي أو أسعار البترول فضلت مرتفعة .. ده هيزود الضغط على الجنيه المصري.. والموضوع كله مرتبط ببعضه.. التوترات الجيوسياسية .. أداء الاقتصاد المصري .. والسياسات النقدية .. كلها عوامل بتشتغل مع بعضها عشان تحدد سعر الدولار.
التعليقات