يا ترى إيه اللي ممكن يحصل لو إيران نفذت تهديدها وقفلوا مضيق هرمز؟ .. هل العالم هيقف وأسعار البترول هتولع زي ما ناس كتير بتقول؟ وهل أساسًا ده ممكن يحصل بجد؟.. الأسئلة دي مهمة جدًا .. خصوصًا مع التوترات اللي بنشوفها كل يوم في المنطقة.. إيران من فترة والتانية بتلوّح بورقة مضيق هرمز.. والمضيق ده مش مجرد ممر مائي عادي .. ده شريان حياة للاقتصاد العالمي كله.
مضيق هرمز بيربط الخليج العربي بالمحيط الهندي .. ومنه لبقية العالم.. وأكتر من 20% من إمدادات البترول العالمية بتعدي من هنا .. وكمان كميات ضخمة من الغاز الطبيعي المسال .. ده غير التجارة العادية من بضايع وسلع مختلفة .. يعني لو المضيق ده اتقفل .. مشكلة كبيرة هتحصل.
طب إيه اللي هيحصل لو إيران قفلت المضيق؟
لو إيران قررت بجد تقفل مضيق هرمز .. العالم هيخش في أزمة اقتصادية غير مسبوقة.. ممكن نقول عليها كارثة اقتصادية.
أول حاجة وأهم حاجة .. البترول.. أسعار البترول هتولع نار .. هتتجاوز كل الأرقام اللي شفناها قبل كده .. ممكن توصل لأرقام خيالية زي 200 أو 300 دولار للبرميل .. ويمكن أكتر كمان. ده لأن الإمدادات هتقل بشكل كبير جدًا.. والعرض مش هيكون مكفي الطلب.
تاني حاجة.. الغاز الطبيعي.. مش بس البترول .. الغاز الطبيعي كمان هيتأثر بشكل كبير .. خصوصًا الدول اللي بتعتمد على الغاز اللي بيعدي من المضيق ده .. زي دول آسيا وأوروبا .. وده هيخلي أسعار الطاقة كلها تزيد بشكل جنوني.
تالت حاجة .. حركة التجارة العالمية..الموضوع مش هيقف عند البترول والغاز بس .. حركة السفن التجارية كلها هتتأثر .. السفن اللي شايلة بضايع وسلع مختلفة هتضطر تدور على طرق بديلة .. وده هيزود تكاليف الشحن بشكل رهيب .. وهياخد وقت أطول بكتير.
تخيل إن فيه بضاعة المفروض توصلك في أسبوع .. ممكن تاخد شهرين أو أكتر .. ده هيعمل فوضى في سلاسل الإمداد العالمية .. وهيخلي المحلات فاضية والأسعار تزيد بشكل مبالغ فيه.
رابع حاجة .. التضخم العالمي.. مع ارتفاع أسعار الطاقة وتكاليف الشحن .. أسعار كل حاجة هتزيد .. الأكل .. الشرب .. الهدوم .. كل السلع اللي بنستخدمها في حياتنا اليومية هتبقى أغلى بكتير .. وده هيعمل تضخم عالمي غير عادي .. وهيأثر على مستوى معيشة الناس في كل حتة.
خامس حاجة .. الركود الاقتصادي.. لما الأسعار بتزيد بشكل كبير .. وقوة الناس الشرائية بتقل .. الشركات بتضطر تقلل إنتاجها .. وممكن تسرح موظفين .. وده بيودينا لركود اقتصادي عالمي .. يعني الاقتصاد هيتوقف عن النمو وممكن ينكمش.
طب هل إيران ممكن تنفذ التهديد ده بجد؟
إيران عندها القدرة العسكرية إنها تقفل المضيق .. أو على الأقل تعطل حركة الملاحة فيه بشكل كبير .. عندهم صواريخ .. ألغام بحرية .. وقوارب سريعة ممكن تستخدم في عمليات زي كده بس في نفس الوقت .. فيه حسابات كتير بتخلي الموضوع صعب.. زي رد الفعل الدولي.. لو إيران قفلت المضيق .. ده هيعتبر عمل عدواني غير مبرر .. وهيكون فيه رد فعل دولي عنيف جدًا .. خصوصًا من أمريكا وحلفائها .. ممكن نشوف تدخل عسكري سريع لفتح المضيق بالقوة
كمان التأثير على إيران نفسها.. لأن إيران نفسها هتتأثر بشكل كبير لو المضيق اتقفل .. جزء كبير من اقتصادها بيعتمد على تصدير البترول والغاز اللي بيعدي من المضيق ده .. فكأنهم بيضربوا نفسهم بالنار.. والشعب الإيراني هيعاني بشكل كبير لو اقتصاد البلد انهار .. وده ممكن يزود الضغط الداخلي على الحكومة .. ويعمل مشاكل أكبر.
وإيه الحلول البديلة؟
الدول الكبرى بتدور على طرق بديلة لمواجهة سيناريو غلق مضيق هرمز .. زي مد خطوط أنابيب جديدة لتصدير البترول والغاز بعيدًا عن المضيق .. أو زيادة الاعتماد على مصادر طاقة متجددة.. لكن الحلول دي بتاخد وقت طويل جدًا .. وكمان مش هتقدر تعوض كل الكميات اللي بتعدي من المضيق.
المؤكد ان مضيق هرمز يعتبر خط أحمر بالنسبة للاقتصاد العالمي .. أي محاولة لتهديده أو غلقه .. هتكون ليها عواقب كارثية على العالم كله.. وبالتالي .. الضغط الدولي دايماً بيكون كبير لمنع أي تصعيد يوصل للمرحلة دي .. وبتفضل التهديدات دي مجرد أوراق ضغط في مفاوضات سياسية.
التعليقات