يا ترى إيه اللي بيحصل في سوق صرف العملات الأجنبية فى اليام الأخيرة.. وليه الدولار عامل قلق ومكمل صعوده .. وهل الارتفاعات دي هتكمل ولا قربنا على نقطة تحول؟
سوق الصرف الأجنبي في مصر بيشهد تحركات قوية .. والدولار الأمريكي بيواصل مسلسل الصعود اللي بدأه من فترة .. طبعًا كتير مننا بيسأل .. إيه السبب ورا الارتفاعات دي؟ وليه الدولار مبيهداش؟
الحقيقة الموضوع معقد شوية ومش مرتبط بسبب واحد .. لكن فيه مجموعة عوامل بتشتغل مع بعضها وبتدفع الدولار للارتفاع ومنها زيادة الطلب على الدولار.. زي أي سلعة في السوق .. لما الطلب بيزيد على الدولار .. سعره بيرتفع .. وده اللي بنشوفه دلوقتي .. فيه طلب كبير على الدولار من مستوردين وتجار ومستثمرين .. ده غير كمان إن بعض الأفراد بيشتروا الدولار كنوع من التحوط أو حفظ القيمة .. وده بيخلق ضغط كبير على المعروض من الدولار في السوق.
كمان من الأسباب .. أزمة السيولة الدولارية.. لسه لحد دلوقتي بنواجه مشكلة في توفير الدولار بشكل كافي لتلبية كل الاحتياجات .. صحيح الحكومة والبنك المركزي بيشتغلوا على حل الأزمة دي .. لكن لسه التأثير بتاعها ملموس .. نقص المعروض من الدولار بيخلي سعره يغلى .. وده طبيعي جدًا في أي سوق.
ضيف على كده التوترات الجيوسياسية العالمية.. طبعًا الأحداث اللي بتحصل حوالينا في المنطقة والعالم ليها تأثير كبير على اقتصادنا .. عدم الاستقرار والتوترات بتخلي المستثمرين يقلقوا ويسحبوا فلوسهم من الأسواق الناشئة .. ويزودوا استثماراتهم في الأصول الآمنة زي الدولار .. وده بيزود الطلب عليه عندنا.
ده كمان بجانب توقعات المستثمرين.. واللى لازم نعرفوا إن التوقعات ليها دور كبير في تحديد سعر أي عملة .. لما المستثمرين بيتوقعوا إن الدولار هيكمل صعوده .. بيبدأوا يشتروا بكميات أكبر .. وده بيحول التوقع لحقيقة وبيخلي الدولار فعلاً يرتفع .. والعكس صحيح طبعًا.
وآخر حاجة أسعار الفايدة العالمية.. الفترة اللي فاتت .. بنوك مركزية كتير في العالم رفعت أسعار الفايدة .. وده بيخلي الدولار الأمريكي أكثر جاذبية للاستثمار .. عشان كده بنلاقي إن رؤوس الأموال بتتحرك ناحية الدولار .. وده بيأثر على تدفقات الدولار لبلاد زي مصر.
المهم دلوقتي .. إيه اللي هيحصل في الأيام الجاية؟ هل الدولار هيكمل صعوده ولا ممكن نشوف استقرار أو حتى تراجع؟
الحقيقة .. التوقعات دايماً بتبقى صعبة .. خصوصًا في سوق متقلب زي سوق العملات .. لكن فيه مؤشرات ممكن تساعدنا نفهم الصورة.. زي مثلا لو استمرت أزمة السيولة الدولارية .. ومعاها زيادة الطلب على الدولار .. أكيد الدولار هيكمل صعوده .. كمان لو التوترات الجيوسياسية فضلت موجودة .. ده هيزود حالة عدم اليقين وهيدعم ارتفاع الدولار.
على الناحية التانية .. لو الحكومة والبنك المركزي قدروا يوفروا سيولة دولارية أكبر .. سواء عن طريق زيادة الصادرات أو جذب استثمارات أجنبية جديدة .. ده ممكن يخفف الضغط على الدولار .. كمان لو حصل استقرار في الأوضاع الجيوسياسية .. ده هيرجع الثقة للمستثمرين .. وممكن نشوف تحسن في سعر الجنيه.
وخد بالك من بعد تحرير سعر الصرف.. سوق الصرف بقا زي البورصة .. فيه صعود وهبوط .. ومحدش يقدر يجزم إيه اللي هيحصل بالظبط .. لكن اللي نقدر نقوله إن فيه جهود كبيرة بتتبذل عشان نوفر الدولار ونستقر سوق الصرف .. وعشان الوضع يتحسن بشكل كبير .. محتاجين نشوف استقرار في الوضع الاقتصادي الكلي .. وزيادة في الإنتاج والصادرات .. وجذب استثمارات أجنبية ضخمة.
التعليقات