هل تنخفض أسعار الذهب خلال الفترة القادمة؟

يا ترى أسعار الدهب رايحة على فين، ليه بيحصل حالة تذبذب في أسعار المعدن الأصفر عالميا ومحليا، وهل عدم الاستقرار السعري ده ممكن يكون بداية الانخفاض الأسعار خاصة في ظل ارتفاع أسعار الدولار؟

في الحقيقة، ناس كتير بتابع سوق الدهب كل يوم، وده لأنه مقياس للاقتصاد العالمي، وبيتحدد على أساسه حاجات كتير، طب الدهب رايح على فين الأيام الجاية؟

بص يا سيدي، دلوقتي أسعار الدهب بتشهد شوية تقلبات، والناس قاعدة بتتفرج وتسأل، هنبيع دلوقتي؟ ولا هنشتري قبل ما يغلى أكتر؟

حاليا، الأسعار مش مستقرة، يعني مثلا سعر الأونصة عالميا وصل ل 3369 دولار،  وكمان عيار 24 بيسجل حوالي 5460 جنيه، أما عيار 21 الاكتر مبيعا وشراء فبيسجل 4780 جنيه، وكمان عيار 18 وصل ل 4100، أما الجنيه الدهب فده ثبت على 38,240 جنيه.

طب ليه سعر الدهب بيتحرك أصلا؟

الموضوع مش بس أسعار عالمية وخلاص، لا ده في شوية عوامل زي حالة الاقتصاد الأمريكي اللي مهتز اصلا ، وكمان التوترات السياسية بين الدول الكبيرة زي حرب روسيا و أوكرانيا، وبردو الحروب اللي دايما ممكن تحصل في أي وقت زي ما حصل بين إيران وإسرائيل، فكل دي حاجات بتخلي الدهب يزيد لمعانه يعني يغلي، خصوصا إنه معروف دايما بأنه استثمار آمن وقت الأزمات، والملاذ الامن، وكمان معظم المستثمرين بيسحبوا فلوسهم وقت الأزمات وبيحطوها فب الدهب عشان مضمون.

كمان، مقدر نقول إن المصريين دايما عندهم حب للدهب من زمان أوي، سواء عشان الجواز للشبكة أو للادخار، ودي حاجة بتخلي سعره أحيانا ما يتأثرش بانخفاض الأسعار عالميا، لأن الطلب المحلي دايما عالي، خصوصا قبل المواسم والأفراح.

فوق كل ده، في حاجة مهمة لازم ناخد بالنا منها، وهس تأثير سعر الدولار مقابل الجنيه، لأن كل ما الدولار يزيد هتلاقي سعر الدهب بيتأثر ويتحرك معاه، حتى لو سعره عالميا مستقر، عشان كده لو مهتم بالدهب فلازم تتابع سعر الدولار كويس.

أما بقى السؤال اللي الكل بيسأله، نشتري دلوقتي ولا نستنى؟

نقدر نقولك إن الإجابة دايما بتختلف من شخص للتاني، فلو فلوسك زايدة وبتفكر على المدى البعيد فالدهب دايما أمان، أما بقى لو بتضارب وهدفك المكسب السريع فيبقى استنى شوية لحد ما السوق يبان اتجاهه، وادخل وقت ما يبقى فيه إشارات واضحة على الصعود.

ودلوقتي، الخبرا شايفين إن اللي عنده دهب يحتفظ بيه على المدى الطويل، أما بقى اللي عايز يشتري فممكن يدخل بكميات بسيطة على مراحل، لحد ما الصورة توضح أكتر، خاصة إن سعر الدولار وتأثيره على الجنيه لسه بيتغير باستمرار،، وفي النهاية، القرار ليك حسب أهدافك ونظرتك للمستقبل.