في الساعات الأخيرة مصر أنهت جميع الإجراءات الخاصة بإصدار الصكوك السيادية في عملية ممكن تتجاوز قيمتها 2 مليار دولار.. في خطوة ممكن تدخل للبلد سيولة دولارية من غير ما نستلف بسندات بفوايد عالية.. فيا ترى يعني إيه الكلام ده؟ ويعني إيه صكوك سيادية أصلا .. وإيه الفرق بينها وبين السندات.. وإيه علاقة ده بتوفير عملة صعبة وإنعاش الاقتصاد.
مصر دلوقتي على وشك خطوة كبيرة في سوق التمويل العالمي.. الحكومة خلصت كل الإجراءات علشان تطرح صكوك سيادية بقيمة ممكن توصل لـ2 مليار دولار.. والإعلان الرسمي عن حجم التغطية النهائي للطرح هيكون خلال أيام.
والسؤال هنا.. ليه الدولة بتعمل كده دلوقتي؟
ببساطة.. الحكومة بتحاول تنوع مصادر التمويل.. يعني مش بس نعتمد على القروض والسندات وأذون الخزانة.. لأ.. الحكومة كمان بتدورعلى أدوات جديدة ومرنة.. والأهم.. بتجذب نوع معين من المستثمرين اللي بيفضّلوا الاستثمارات المتوافقة مع الشريعة.
يعني إيه الكلام ده؟
فيه شريحة ضخمة من المستثمرين في الخليج وآسيا وحتى في أوروبا.. ما بيدخلوش استثمارات تقليدية زي السندات.. لأنهم بيدوروا على أدوات متوافقة مع الشريعة.. وهنا بييجي دور الصكوك.
الصكوك ببساطة هي أداة تمويلية.. الدولة بتستخدمها علشان تموّل مشاريع أو تغطي احتياجات مالية.. لكن بدل ما تديك فوايد ثابتة زي السند.. الصك بيعتمد على فكرة إنك شريك في الأصل.. يعني ليك جزء من العائد.. مش مجرد فوايد.
والفكرة هنا إنك بتكسب ثقة نوع مختلف من المستثمرين.. ناس عندهم سيولة ضخمة ومستعدين يدخلوا السوق المصري بشرط يكون الاستثمار موافق لمبادئهم.
طب إيه أهمية الطرح ده؟
رقم واحد.. هيدخل عملة صعبة.. الطرح ده لو نجح وجاب 2 مليار دولار أو أكتر.. فده يعني سيولة دولارية تدخل البلد وده معناه دعم للاحتياطي النقدي.. وراحة أكتر في التعامل مع التزامات الدولة.
رقم اتنين.. سمعة سوقية للاقتصاد المصري .. مصر لما تنجح في طرح صكوك سيادية بشكل احترافي.. ده بيبعت رسالة للعالم إن السوق المصري جاهز ومرن وبيفتح الباب لطروحات تانية مستقبلاً.. سواء بالدولار أو حتى بالجنيه.
رقم تلاتة وده مهم جدا .. خفض الدين العام.. الرئيس أصدر قرار جمهوري بتخصيص أرض ضخمة لصالح وزارة المالية.. وده مش عشوائي.. الأرض دي ممكن تستخدم في إصدار الصكوك.. والعائد منها يروح لسداد جزء من الدين.. وده معناه تخفيف الضغط على الموازنة.
في النهاية.. الطرح ده مش بس أداة تمويل .. ده خطوة مدروسة لجذب نوع مختلف من المستثمرين.. وتوفير سيولة دولارية.. وتحسين صورة الاقتصاد المصري قدام العالم.. والأهم إننا بنقول للعالم إن مصر بتفكر برا الصندوق.. وبتستخدم أدوات مالية حديثة وفعالة
التعليقات