في الساعات الأخيرة منصات التواصل الاجتماعي فى تركيا مالهاش سيرة غير عن محمد صلاح.. واللى حصل لنجم ليفربول في واحد من أشهر مطاعم الاسماك في بودروم الساحلية.. وكل المؤثرين وصناع المحتوى الأتراك مهتمين بالموضوع اللى قالب الدنيا عندهم .. فيا ترى ايه اللى حصل؟
بص يا سيدي نجم ليفربول والمنتخب المصري محمد صلاح بيقضي حاليا أجازته السنوية فى تركيا وامبارح كان بيتعشا فى أحد مطاعم السماك الفاخرة فى تركيا.. لحد هنا والموضوع عادي لكن اللى مش عادي.. انه تم تداول صور وتفاصيل فاتورة عشاء صلاح فى مطعم الأسماك التركي بمنطقة جوموشلك بمدينة بودروم الساحلية واللى وصلت لحوالي 60 ألف ليرة تركية (ما يُعادل 1800 دولار أمريكي) يعنى رقم قريب من 100 الف جنيه مصري دفعها أبو صلاح فى وجبة سمك واحدة.
وانتشرت تفاصيل الفاتورة بشكل واسع على منصات التواصل الاجتماعي التركية واعتبر البعض أن المبلغ مقبول بالنظر إلى أسعار المطاعم السياحية الفاخرة في بودروم.. لكن فيه ناس تانية شافت ان المبلغ مبالغ فيه جدا حتى لو كان الضيف نجم عالمي
وبيحظى محمد صلاح بشعبية ملحوظة في تركيا وبتحرص وسائل الإعلام المحلية على متابعة تحركاته باستمرار خلال زياراته الخاصة.
ويقضي محمد صلاح عطلته الصيفية بعد موسم استثنائي مع ليفربول، قاد فيه الريدز للتتويج بلقب الدوري الإنجليزي، إلى جانب فوزه بجائزة أفضل لاعب في الموسم، ولقبي هدّاف الدوري وأكثر من صنع أهدافًا في البريميرليج.
واختار صلاح بودروم لقضاء عطلته الصيفية وشوهد وهو بيتناول العشاء برفقة 7 من أصدقائه في مطعم مطل على البحر، قبل ما ينتقل بعد كده إلى نادٍ ليلي في منطقة ياليكافاك.
ووفقًا لوسائل اعلام تركية حاول بعض الزباين تصوير النجم المصري أثناء تواجده بالمطعم إلا أن صلاح بادر بلطف إلى طلب احترام خصوصيته وقال نصا : “أنا هنا فقط لقضاء عطلة، من فضلكم احترموا خصوصيتي”.
التعليقات