يا ترى إيه اللي حصل للدهب الأسبوع اللي فات، وليه ماحدش كان متوقع اللي حصل، والأسعار دلوقتي عاملة إيه، وإيه المتوقع الأيام الجاية؟
في الأيام الأخيرة، الدهب شهد انهيار ملحوظ في الأسعار سواء عالميا او عندنا في مصر، والجرام عيار 21 خسر حوالي 190 جنيه في أسبوع واحد بس، وده بعد ما كان فاتح على 4800 جنيه، لكنه قفل الأسبوع على 4610 جنيه.
عندك كمان، الأوقية نزلت هي كمان جامد، وتحديدا من 3369 دولار ل 3274 دولار، يعني خساير حوالي 95 دولار، طب الأسعار وصلت لإيه دلوقتي؟
بص يا سيدي، عيار 24 سجل 5269 جنيه، وكمان عيار 21 ب 4610 جنيه، وعيار 18 ب 3951 جنيه، وعيار 14 ب 3074 جنيه، اما بقى الجنيه الدهب فسجل 36880 جنيه، يعني لو كنت ناوي تشتري، فالوقت ده ممكن يكون مناسب.
ونقدر نقول، إن الدهب نزل رغم إن الظروف مفروض ترفعه، وهنا بقى المفاجأة لأن الدولار ضعيف، وفي توقعات بخفض الفايدة.
ووسط كل ده، المستثمرين بقوا يفضلوا يحطوا فلوسهم في أصول تانية بعائد أعلى، خاصة في البورصة والأسهم اللي ماشية كويس اليومين دول.
وكمان، في أخبار حلوة على المستوى العالمي، وهي أمريكا والصين وقعوا اتفاق تجاري، والصين هتسرع تصدير المعادن النادرة لأمريكا، وكمان الحرب بين غزة وإسرائيل ممكن تقرب نهايتها، وفوق كل ده إيران بقت أهدى مع أمريكا، يعني في تهدئة جيوسياسية، وده قلل الطلب على الدهب كملاذ آمن.
طب هل فيه فرصة إن الدهب يطلع تاني؟
بص يت سيدي، ممكن اه بس مش دلوقتي، ولكن البيانات الأمريكية عن التضخم صدمت ناس كتير، وبرضو الفيدرالي الأمريكي بيفكر يخفض الفايدو 2%.
والخلاصة هي، إن الدهب نزل جامد الأسبوع اللي فات، ولكن الأسواق متفائلة باتفاقات سياسية واقتصادية، لكن مفيش ضمان إنه يفضل نازل، ولا إنه يطلع تاني قريب، فلو ناوي تشتري تابع الأسعار يوم بيوم، أما بقى لو أنت مستثمر، فتابع المؤشرات العالمية أول بأول.
التعليقات