مصر بتطلع كنز جديد من تحت الأرض، وده هينتج أكتر من 50 مليون قدم مكعب من الغاز الطبيعي.. بس يا ترى، ده هيفيد مصر إزاي؟.. وهل هنسدد منه كل ديون مصر ونحقق الاكتفاء الذاتي من الغاز؟
مصر بتحفر وبتستثمر عشان تزود الإنتاج المحلي من الغاز، وده معناه حاجتين مهمين، أنها هتقلل الاستيراد وهتوفر عملة صعبة، ده غير أنها هتزود فرص التصدير وهتكسب ملايين الدولارات.
هل الموضوع ده صدفة؟
طبعا الموضوع مش صدفة، لأن ده ضمن خطة كاملة لحفر آبار جديدة ورفع الإنتاج من الغاز، اللي بيغطي جزء كبير من كهربتنا ومصانعنا، وكمان بيتصدر لدول تانية، وده في إطار خطة الدولة لزيادة الإنتاج من الحقول الموجودة دلوقتي بدل ما نفضل ندور على استيراد غاز بأسعار نار من بره.
يعني ببساطة كل بئر جديد زي ده بيقربنا من الاستقلال الطاقي، وبيحط في جيبنا ملايين الدولارات من التصدير، وده بيساعد على دعم الاقتصاد وتقليل الضغط على الجنيه، يعني وأنت قاعد دلوقتي بتتفرج، فيه غاز بيتسحب من تحت الأرض علشان ينور بلدك، ويزود دخلها.
ووسط النجاحات اللي حققتها مصر من حقل ظهر أهم حقول الغاز الطبيعي في مصر؛ واللي ساعدت على الاكتفاء الذاتي، وتوفير الفاتورة الاستيرادية من الغاز الطبيعي، دلوقتي جهاز الحفر بدأ أنه يكمل مهمته المخططة عشان يحفر “بئر 13” واللي بيتوقع أنها تضيف 55 مليون قدم مكعب يوميًّا من الغاز وده وفق الدراسات الهندسية، لأن ده هيعزز منظومة الإنتاج المحلي، ودهكلام وزارة البترول مش كلامنا احنا.
إيه السبب في النجاحات دي كلها؟
الشراكة الناجحة بين شركة إيني الإيطالية ووزارة البترول المصرية، ساعدت بشكل كبير على استكمال خطط التنمية، لأن ده بيضمن سرعة تنفيذ عمليات الحفر وتطوير الحقل باستخدام أحدث التقنيات العالمية في المياه العميقة، خصوصا في ظل الدعم الكامل من الحكومة المصرية بمختلف أجهزتها لتشجيع جميع الاستثمارات في قطاع البترول المصري وتعظيم معدلات الإنتاج المحلي وضمان أمن الطاقة واستدامة مواردها.
الخلاصة، أن كل بئر جديد بيتحفر بيساوي خطوة لقدام في اقتصاد أقوى وطاقة مستقرة ومكانة أكبر لمصر على خريطة الطاقة العالميةـ منات بيزود الإنتاج المحلي، وبيخلي مصر تقلل اعتمادها على الغاز المستورد وبتوفر عملة صعبة، وبتصدر الفائض، وده بيدخل دولارات أكتر للبلد، ده غير كمان هيوفر الغاز للمصانع والكهرباء وده معناه إنتاج مستقر وتكلفة أقل.
التعليقات