يا ترى إيه قصة العربيات الجديدة اللي بتدخل برنامج حوافز تنمية الصناعة، ايه هي المميزات اللي هتستفيد بيها من المبادرة دي، وامته تتطبق؟.
ناس كتيرة ناوية تشتري عربية جديدة وبتفكر تستفيد من الحوافز اللي الحكومة بتقدمها في برنامج “تنمية صناعة السيارات”، عشان مده هنقولك الشرط الجديد اللي الحكومة أعلنت عنه.
بص يا سيدي، الحد الأقصى لسعر العربية اللي ينفع تستفيد من البرنامج بقى مليون و250 ألف جنيه بس، يعني لو عربيتك أغلى من كده، مش هتدخل تحت مظلة الحوافز دي.
طب إيه هو البرنامج ده أصلا؟
ده برنامج حكومي هدفه يشجع التصنيع المحلي للعربيات، ويحفز الشركات على الإنتاج جوه مصر بدل ما نستورد كل حاجة، واللي هينتج عربيات بنسبة مكون محلي محترمة، وكمان يحقق اشتراطات معينة هيستفيد من حوافز مالية مغرية.
ومن ضمن الشروط المهمة، العربية ما تزيدش عن مليون و250 ألف جنيه، والموتور ما يكونش أكبر من 1600 سي سي، وكمان المصنع يحقق إنتاج سنوي بحد أدنى 10 آلاف عربية، اما بقى نسبة التصنيع المحلي فبتوصل ل 20% كبداية، وللعربيات الكهربائية 10%.
كمان، في حاجات تانية هتاخد عليها حوافز إضافية زي زيادة الاستثمار، والالتزام بالبيئة وإنتاج عربيات في مناطق صناعية أولوية، وده كله علشان مصر تدخل عالم تصنيع السيارات بجد، مش مجرد تجميع وخلاص.
ونقدر نقول، إن الحوافز نفسها ممكن توصل ل 150 ألف جنيه لكل عربية، بس لازم تكون ملتزم بالشروط ومحقق الإنتاج والمكون المحلي المطلوب، ولو زودت نسبة المكون المحلي عن 35%، فالحكومة هتديك كمان 5 آلاف جنيه إضافية عن كل 1% زيادة.
وبردو، الشركات اللي هتنتج عربيات كهربا ممكن تستفيد بنص الحوافز لو حققت الحد الأدنى من الإنتاج والمكون المحلي، وده كله بيدخل في إطار خطة الدولة لإنشاء صناعة سيارات حقيقية تقدر تنافس في السوق المحلي والدولي كمان، مش مجرد استهلاك.
وفي مفاجأة كمان، وهب إن حتى العربيات اللي هتصدرها بره مصر، فالشركة هتقدر تاخد عليها حوافز، يعني الحكومة بتحفز كمان على التصدير، وده معناه تنافسية أكبر وفرص تصدير أحسن.
والخلاصة، هي انك لو بتفكر تشتري عربية جديدة وتستفيد من حوافز “تنمية الصناعة”، لازم تتأكد إن سعرها ما يعديش 1.25 مليون جنيه، وسعة المحرك مش أكتر من 1600 سي سي، ولو إنت صاحب مصنع فركز في المكون المحلي والإنتاج الكمي لأن ده اللي هيفرق في الدعم اللي هتاخده.
التعليقات