يبدو إن الصيف ده هيكون مولّع في أنفيلد! مصادر مقربة من نادي ليفربول، وبحسب ما نقلته صحيفة “آس” الإسبانية، كشفت عن اهتمام حقيقي من “الريدز” بضم النجم البرازيلي رودريجو، جناح ريال مدريد، ضمن خطة النادي لتقوية هجومه قبل انطلاق الموسم الجديد.
القصة مش مجرد شائعة عابرة، رودريجو داخل دائرة الضوء بقوة، والسبب؟ احتمالية كبيرة إن لويس دياز يخلع من ليفربول في أي لحظة، خاصة مع اهتمام أندية تقيلة زى بايرن ميونخ وبرشلونة بخدماته. وساعتها، ليفربول هيكون محتاج جناح سوبر يسد الفراغ الكبير اللي هيسيبه دياز وميخليش الجمهور يفتقده كتير.
بس… هل في خطوات جدية؟ حسب الصحيفة، لحد دلوقتي، ريال مدريد ما استقبلش ولا عرض رسمي، لا من ليفربول ولا من أي نادي تاني. كله كلام واهتمام… لكن لسه محدش خبط على الباب!
المثير في الموضوع إن رودريجو مش بس على رادار ليفربول، لأ، ده عليه طابور من المهتمين: باريس سان جيرمان بيبصله، وبرشلونة بيراقب، والنصر السعودي بيدق الباب بقوة!
اللي بيحصل حوالين رودريجو بيأكد إننا قدام واحد من أهم نجوم السوق الصيفي. ليفربول داخل السباق… بس السؤال الحقيقي: هل هينجح في خطفه قبل ما يطير لحد تاني؟
التعليقات