رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، صعود مفاجئ للدولار، وتراجع كبير في مشتريات المصريين للدهب، ومشروعات جديدة في قناة السويس.
نبدأ بأول خبر من سوق الصرف..
الدولار رجع يتحرك تاني قدام الجنيه.. وارتفع بحوالي قرشين في تعاملات النهارده.
وسعر الدولار سجل في البنك المركزي المصري:
48.64 جنيه للشراء
48.78 جنيه للبيع
أما في بنك مصر فسجل:
48.66 جنيه للشراء
48.76 جنيه للبيع
ونفس الأرقام تقريبًا في البنك التجاري الدولي CIB:
48.66 جنيه للشراء
48.76 جنيه للبيع
طب ليه الدولار عليه التركيز ده؟
ببساطة لأنه من أهم العملات اللي بتتداول جوه البنوك المصرية.. وده بسبب دوره الكبير في التجارة العالمية والاقتصاد الدولي.
وسعر صرف الدولار بيأثر بشكل مباشر على أسعار السلع والخدمات اللي بنشتريها.. خصوصًا الحاجات اللي بنستوردها من برّه.
وسعره بيتحدد حسب العرض والطلب وكمان السعر الرسمي اللي بيعلنه البنك المركزي.
ونروح لسوق الدهب..
النهارده مجلس الذهب العالمي أعلن عن مشتريات المصريين من الدهب خلال الربع التاني من سنة 2025
الرقم وصل لـ 11.5 طن دهب.. بانخفاض 20٪ عن نفس الفترة في 2024 اللي كانت 14.4 طن
بس اللافت إن الرقم ده أعلى من الربع الأول 2025 اللي كان 11.1 طن.. يعني زاد بنسبة 3.6٪.
طيب تفاصيل أكتر؟
مشتريات المشغولات الذهبية كانت 5.7 طن.. أقل من نفس الفترة السنة اللي فاتت اللي سجلت 6.8 طن وبرضه أقل من الربع الأول 2025 اللي كان 6.4 طن.
أما عن السبائك والعملات الذهبية فسجلت 5.9 طن انخفضت 23٪ مقارنة بالربع التاني من 2024 اللي كانت 7.6 طن لكن ارتفعت عن الربع الأول اللي كان 4.7 طن.
ومجلس الذهب العالمي أشار إن سبب التراجع في المشتريات بيرجع لـ إن ناس كتير بدأت تبيع دهبها بعد ما الأسعار عليت جدًا فناس كتير قررت تلم أرباحها.. خصوصًا لما الدهب بطل يحقق أرقام قياسية جديدة.
وننقل على قناة السويس..
النهارده وليد جمال الدين رئيس الهيئة العامة للمنطقة الاقتصادية لقناة السويس، حضر وضع حجر أساس لمشروعين صناعيين جداد في قطاع الصناعات النسيجية.
المشروعات دي جوه نطاق المطور الصناعي تيدا – مصر في المنطقة الصناعية بالعين السخنة.
أول مشروع هو لشركة بريدج تكستايل إنترناشيونال إيجيبت..
والمشروع عبارة عن مجمع صناعي متكامل على مساحة 40 ألف متر مربع
باستثمارات أكتر من 25 مليون دولار
هيكون فيه مباني إدارية وسكنية.. و18 خط غزل.. أكتر من 100 خط لإنتاج الأقمشة و6 خطوط للطباعة والصباغة.. وده كله عشان يوصلوا لإنتاج الأقمشة النهائية.
الطاقة الإنتاجية السنوية المتوقعة:
25 مليون متر قماش عالي الجودة.
105 ألف طن ألياف هيتم توفير حوالي 500 فرصة عمل مباشرة.. و1000 فرصة غير مباشرة.
أما المشروع التاني فهو تابع لشركة إف تكس إنترناشيونال على مساحة 55 ألف متر مربع هيضم 60 خط لإنتاج ألياف البوليستر المشدودة استثمارات بـ حوالي 30 مليون دولار.
ومن المتوقع يدخل مرحلة التشغيل الكامل قبل نهاية 2027
الإنتاج السنوي: 130 ألف طن
ويوفر 400 فرصة عمل مباشرة
ومن المتوقع يحقق عائدات تصديرية توصل لـ150 مليون دولار سنويًا.
ولسه مكملين مع قناة السويس
الفريق أسامة ربيع رئيس الهيئة، كشف إن إجمالي إيرادات قناة السويس من وقت التأميم سنة 1956 وصلت لـ 153.4 مليار دولار.
خلال نفس الفترة.. عدد السفن اللي عدت من القناة وصل لـ 1.1 مليون سفينة
أما حجم البضائع اللي عبرت فوصل لـ 33.076 مليار طن.
ومن 2019 لحد 2024.. الإيرادات وصلت لـ 40 مليار دولار وكان المستهدف السنة دي فقط نحقق 12 مليار دولار.
لكن اللي اتحقق فعليًا هو 4 مليار دولار بس وده بسبب الأزمات اللي حصلت في البحر الأحمر وهجمات الحوثيين اللي أثرت سلبيًا على حركة الملاحة.
التعليقات